Päävapilt: Jüvä Sullõv

Võrokõisi Kongressi Vanõmbidõ Kogo (VKVK) kõrraldõt seminäär „Võrokõsõq, võro kiil ja keelepoliitiga“ tõi kokko paigapäälidse ja riigivõimu edüstäjäq, võro keele ja kultuuri iist saisjaq ni tõisi põlisrahvidõ iistkõnõlõjaq ja aśatundjaq. Üten märgiti võimaluisi võrokõisi ja võro keele tunnistamisõs ja tugõmisõs.

Võro Kandlõh riidi võro keele nädäli kõrraligus ja kõva pauguga lõpõtusõs peetü seminääri päämädseq arotusküsümüseq olliq:
* Midä võrokõsõq tahtvaq ja kuis näil lännüq om?
* Midä om Euruupa põlisrahvidõ ja piirkunnakiili kogõmuisist oppiq?
* Mille ja kuis saa võrokõisilõ toes ollaq paigapääline ja riigivõim?

Tervütüses võtiq sõnna VKVK päävanõmb Kuuba Rainer, siseministri Taro Igor ni Setomaa edüstäjä Kudre Raul.

Ettekandjist oll' edimäne võro kiränik ja VKVK asõpäävanõmb Kauksi Ülle, kiä kõnõl' lühkühe võro liikmisõ aoluust ja täämbätsest pääväst. Päält timmä kõnõl' Tarto ülikooli profesri Lindströmi Liina keeletiidüse uurmiisi perrä võro ja seto keele täämbätsest saisost. Tä rõhut', et um viimäne aig lõunõeesti kiili riikligus tunnistamisõs ja kõrraligus tugõmisõs.
Tuust, kuis võrokõsõq uma keele riiklikku tunnistamist ja tugõmist läbi mitmõ aastakümne pallõlnuq ja nõudnuq ummaq ja midä Eesti riik näile vastanuq um, kõnõl' umah põh'aliguh ettekandõh VKVK päävanõmb Kuuba Rainer. Timä ette ettekandõl, miä esiq oll' muidoki võrokiilne, oll' uhkõ eestikiilne päälkiri „Kuidas võru ja seto etnoregionalistid ründasid eesti keele kindlust“.

Keeletiidläne ja indiaani kiili uurja Pargi Indrek kõnõl' üle videosilla õkva USA-st, Dakota osariigist, mille olõ-õi kahtlustki, et võro kiil om umaette kiil. Taa mano tõi tä näüdüssit ja võrrõluisi mitmist keelist üle ilma, külh Euruupast, Hiinast ku ka indiaani keelist.

Miiq lõunõnaabridõ liivlaisi ja latgallõ keele staatusõst ja Läti keelepoliitikast kõnõliq Liivi instituudi päämiis Ernštreidi Valt ja inneskine Läti haridusministri ni kuulsa latgali keele iistvidäjä Šuplinska Ilga. Timä latgalikiilse ettekandõ pand’ õkva käügipäält puhtahe võro kiilde ümbre Lätist, Kornetist peri tunnõt eesti-võro-läti tõlk Prangli Jaan.

Päält ettekandit peeti maaha kats märgütüstsõõri. Edimädseh märgütedi võro keele riikligu tunnistamisõ ja tõõsõh paigapäälidse poliitiga ni võrokiilse haridusõ ja võro hindätiidmise tugõmisõ ja takasttoukamisõ üle – mille ei saaq, mille piät, miä ommaq hirmuq? Naist jututsõõrõst võtiq lisas miiq umilõ võro keele oppajilõ ni Võro instituudi ja VKVK võro keele ja võrokiilse haridusõ edendäjile ossa ka eksharidusministri Lukasõ Tõnis, siseministri Taro Igor, liivi laulja ja kultuuritegeläne Julgī Stalte, Setomaa vallajuht Kudre Raul ni vähämbüisi ja põlisrahvidõ õiguisi aśatundja Loode Oliver.

Tõsidsõ arotuspäävä lõpõtusõs pakiq vägevä muusikalidsõ lõpupala võro lauljaq-luulõtajaq Ilvese Aapo ja Rahmani Jan ni liivi laulja Stalte Julgī. Kõik nä lauliq umah imäkeeleh.
Ossa võtma olliq oodõduq vallaamõtniguq, kultuuritüü kõrraldajaq, värskilt vallavolikokkõhe validuq saadiguq, riigikogo liikmõq, haridus- ja keelepoliitiga ala ammõtniguq ni kõik võrokõisi ja võro keele iist saisjad ja ütenmõtlõjaq. Või üteldäq, et kõiki näid oll'gi Võro Kandlõ saali peris kõrralik hulk (ligi 50 inemist) kokko kogonuq ja kimmähe saiq kõik ossavõtjaq võro keelepoliitiga teema hindäle pall'o selgembäs.

Üts seminääri selgelt hüvvi tulõmuisi oll' näütüses tuu, et siseministri Taro tekk' õkva päält seminääri ütismeediähe postitusõ. Tuuh kuts' tä üles võro, seto jt lõunõeesti kiili lõpus ummõhtõ säädüseh tunnistama ku põlitsit piirkunnakiili ja nakkama naid kõrraligult riikligult tugõma.

Seminääri kavva näge VKVK kodolehe päält (vorokongress.ee) ni pilte jm teedüst löüd viil mano vanõmbidõ kogo FB-lehe päält.

 

Autor: JÜVÄ SULLÕV
Viimati muudetud: 14/11/2025 08:21:57