Ansambel Liiso Tõrva kevadpeol. Foto: erakogu

Joba mitu aastakka om meid, pääliina võrokõisi ehk Tallinna Võru Seltsi (TVS) kutsutu Eesti Kultuuriseltside Ühenduse (EKSÜ) keväjädsele peolõ. Nii ka timahava. TVS-i ansambli Liiso nakas tuu esinemise puhus aiksahe laulõ harotama.

A minka Tõrvahe minnä? Võtimi vasta Tallinna mulkidõ lahkõ kutsõ tulla näide bussiga.

Puulpäävä, lehekuu 20-ndäl, hummogu 7.30 oll` Estonia tiatri iist minek. Kell 10.30 pidimi Pigiliinan (Tõrvan) olõma.

Edimält läts sõit ilosahe, a kuna nuur, 20 aastadsõs saanu Liiso oll´ kenäst keväjäst nii särtsu täus, naksi perämädse bussiratta suitsõma.

Juht pidi bussi kinni ja kutsõ abiväke. Mõnõ ao peräst tullgi Põltsamaalt as`atundja mutrivõtmidõga ja käändse paar polti külest är, et nuu`sõitu ei sekäs ja pidurit pidevält pääl ei peäs. Veidü maad sai sõidõtus, sis kaeti olukõrd jälki üle. Remondimiis sõitsõ uma massinaga meil mõni aig takan, et ku viil api vaia, roni vahtsõlõ bussi ala. Oll` õnnõs sääne kõhnakõnõ miis, et mahtu bussi kõtu ja tii vaihõlõ tüüd tegemä. Teno tä abilõ ja nutikusõlõ saimi kellä 12.30-s õks Tõrvahe. Õkva lõuna aos. Hummogudsõ etteastõ jäi külh kuulmalda-nägemäldä, a mulgi` sai `umas esinemisõs kenäste lava pääle.

Kell 14.00 oll`mi, folkansambli Liiso laulmisõ kõrd Nopri Tea juhtmisõl, iistlaulmisõl ja akordionimängu tugõmisõl.

Päält tuud sai kuulda EKSÜ avvuesimehe Haamõri Valteri sõnnu: „Kuidas teil küll iga kord nii hästi välja tuleb?”

Pääle meid tulliva regilaulu` Rakke Valla Hariduse Seltsi puult. Sis naksiva Narva Värtna tandsma ja „Juhhaidi“ laulma nii, et hindälgi tull`tandsuisu pääle.

A ku pärnakate Kuldne Kungla võrukeelitsit laulõ nakas laulma, oll`süämen hüä, lämmi tunnõ.

Perämädses tull`ütislaul „Kungla rahvas”. Sjookõrd saimi üten tõisiga „registri valla lüvvä”. Peo algusõ ütislaulu „Kas tunnõt maad” pidimi bussirahvaga tii pääl ollõn är´ laulma.

Peo lõpun andsõ EKSÜ juhatusõ esimiis Toomõ Meelis egäle kollektiivile tenokirä ja peo tugõjilõ viil tsipakõsõ kingitüse kah.

Ku pidu läbi, võtsõ bussinõna suuna Helme Koduluu Muuseumi poolõ.

Tubli`inemise`, kiä vanarahva varra nii hüäste kor´anu ja hoitnu omma. Sääl oll`nii tutvit ku tundmalda tüüriistu.

Kõõ suurõmba üllatusõ aga tekse meile kohaligu kerigu kellämehe pojapoig Meltsasõ Arvo, kiä mi tulõgi avvus oll´pilli ja võimõndusõ`maja ette üles säädnü. Ku mi sis muuseumist vällä astsõmi, kisksõ jalg vägüsi tandsulõ. Pääle pikkä bussisõitu oll`tuu õkva õigõ asi õigõ kotusõ pääl ja illos algus muuseumiüüle!

Kokkovõttõs tulõ üüldä, et kõik om hüä, mis hüäste lõpõs.

Jakkugu Eesti Kultuuriseltside Ühenduse juhtkunnal tahtmist ja jõudu õks ütenkuun edesi minnä!

Autor: MÜÜRSEPÄ KÜLLI, Liiso „sopraano”
Viimati muudetud: 25/05/2017 05:43:38